2010 பதிவுலக விருதுகள் – இந்தமுறை நெஜமாலுமே…

ஒரு விருதுக்கு மதிப்பு என்பது அந்த விருது கொடுக்கப்படும் நேர்மையை பொருத்தது. நேர்மையற்று கொடுக்கப்படும் விருதுகள், கொடுப்பவருக்கோ, வாங்குபவருக்கோ தற்காலிக சந்தோசத்தை கொடுத்தாலும், அதிக காலம் நிலைப்பதில்லை. யுனிவர்சிட்டிகளின் தற்போதைய டாக்டர் பட்டங்களுக்கு நேர்ந்த கதிதான். விஜயகாந்துக்கும், விஜய்க்கும் கொடுக்கப்படும் டாக்டர் பட்டங்கள், அவர்கள் பெயருக்கு முன்னால் வேண்டுமானால் போட்டுக்கொள்ள வசதியாக இருந்திருக்கும், ஆனால் அந்த பட்டங்களுக்கு….???

அவார்டு என்று பதிவு எழுத ஆரம்பித்தவுடனே, மனதில் ஒரு உறுதி கொண்டேன், கண்டிப்பாக நேர்மையுடன் வழங்குவதென்று. என்னால் முடிந்த அளவுக்கு நேர்மையுடனே இதை எழுதியிருக்கிறேன். ஆனால், கருத்துக்கள் மனிதர்களுக்கேற்ப மாறுமென்பது போல, இவை அனைத்தும் நான் படித்த , அல்லது என் கண்ணில் பட்ட பதிவர்களே. இன்னும் எழுதுவதே வெளியே தெரியாமல், ஓட்டுக்களும் கமெண்டுகளும் இல்லாமலேயே பல பதிவர்களின் படைப்புகளை பார்க்கும்போது என் மனதில் நிற்கும் ஒரே கேள்வி “ஏன் இவர்களெல்லாம் வெளிச்சத்துக்கு வருவதில்லை”

2010 – பதிவுலகம் என்று பார்த்தால், குறிப்பிடத்தக்க மாற்றம் எதுவும் நிகழவில்லை. பதிவுலக சங்கம் என்று ஆரம்பிக்கும் எண்ணம் முளையிலேயே கிள்ளி எறியப்பட்டது. இதுதான் இங்கு பலவீனமும் கூட.. பல்வேறு வேறுபாடுகள் இருந்தாலும், ஒன்றாக இணையவேண்டும் என்ற ஒற்றுமை யாரிடமும் இருப்பதாய் தெரியவில்லை. “இவன் பேச்சை நாம் என்ன கேட்பது”, “ஒருவேளை நம்மை ஊறுகாய் ஆக்குறாயிங்களோ” என்ற எண்ணமே அனைத்தையும் பாழாக்கியது. முதல்படியாக ஆரம்பித்த குழு இமெயில் “டீச்சர் என்னை கிள்ளி வைச்சுட்டான்” என்ற சண்டை போடவே சரியாய் போனது. மாறி, மாறி சண்டை போட்ட இமெயில்களை பார்த்தாலே, கடுப்பாய் வந்தது. இதனாலேயே நிறைய பேர் விட்டால் போதும்டா சாமி என்ற அலறியடித்து ஓடினார்கள்

நிறைய பதிவர்களின் நூல்கள் வெளிவந்தது சந்தோசமாக இருந்தது. வாரஇதழ்களின் பார்வையும் பதிவர்களின் பக்கம் திரும்பியது, பதிவர்களுக்கு சற்றே நம்பிக்கையை கொடுத்தது. பதிவுலகம் பரவலாக கவனிக்கப்படுகிறது என்பதற்கு இதுவே சான்றாக அமைந்தது. ஆனாலும் வெகுஜனமக்களிடம் இருந்து பதிவர்கள் கொஞ்சம் தள்ளி இருப்பதாகவே தோன்றுகிறது. பலமுறை வெகுஜனமக்களின் முடிவுகளுக்கும், பதிவர்களின் கருத்துக்களுக்கும் பெரிய இடைவெளி என்ன, பள்ளதாக்கே இருப்பதாய் தோன்றுகிறது.

படிப்பவர்களை முடிந்த அளவுக்கு, சிந்திக்க வைக்கும் அல்லது சிரிக்கவைக்கும் பொறுப்பு பதிவர்களுக்கு இருப்பதையே, பல பேர் மறந்துபோய்விடுகிறோம். கட்அவுட்டுக்கு பால் ஊத்துவதையும், நடிகன் படம் ரீலீஸ் ஆகும்போது, கோயிலில் அங்கபிரட்தசணம் செய்வதை தவறு என்று இன்னுமே நினைக்காத ரசிகன், பதிவுகளில் இன்னமும் நியாயப்படுத்தப்படுகிறான். “தலைவர் மேல் உள்ள அன்பே இதற்கு காரணம்” என்று பதிவுகளில் எழுதப்பட்டு, படிக்கும் ரசிகனும் இன்னும் வெறியேத்தப்படுகிறான். இது ஒவ்வொருவருக்காய் பரவி, பரவி, ஒரு தலைமுறையே நாசமாக போகும் ஆபத்து, இன்னும் உணரப்படவில்லையே என்பதே ஆதங்கமாய் இருக்கிறது. இதை தவறு என்று புரியவைக்க நினைக்கும் சிலபதிவர்களுக்கு வரும் கெட்டவார்த்தை கமெண்டுகளாலேயே பயந்துபோய்விடுகிறார்கள். “எக்கேடு கெட்டு போங்கயா” என்ற சராசரி மனநிலைக்கே கூடிய சீக்கிரம் ஆளாக்கபட்டுதல், பதிவுலகத்தின் இன்னுமொரு கொடுமை.

வெகுஜனமக்களின் பிரச்சனைகளை தொட்ட சில பதிவர்களும், புகழின் போதையில் மாறிப்போனார்கள். ஹிட்ஸ் கணக்குகளும், ஓட்டுப்பட்டையின் அதிகப்பட்ச நம்பர்களும், உணர்ச்சிவசப்பட்ட ஒன்றிரெண்டு வாசகர்களின் “உங்கள் பதிவை படித்தாலே..” என்பது போன்ற இமெயில்களும் தலைக்கேறி பிரபலபதிவர் ஆயிட்டோமுல்ல மனப்பான்மையை சீக்கிரம் கொண்டுவந்துவிடுகிறது. சுயதம்பட்ட பதிவுகளில் ஆரம்பித்து, காலையில் பல்விளக்கியது, பணியாரம் சாப்பிட்டது என்று தன்னைப்பற்றியே எழுதி, தங்களுடைய அடையாளத்தை சுத்தமாக தொலைத்துப்போனார்கள்.

மேலே உள்ள அனைத்து கருத்துக்களில் கூறப்பட்ட “பதிவர்கள்” என்ற வார்த்தைகளில் நானும் இருப்பதை கண்டிப்பாக ஒத்துக்கொள்கிறேன். இந்த புத்தாண்டிலாவது, முடிந்த அளவிற்கு வெகுஜனமக்களின் பிரச்சனைகளைத் தொடுவதிலோ, அல்லது அவர்களுடைய உணர்வுகளை பிரதிபலிப்பது போன்ற பதிவுகளை எழுதுவதிலோ, கவனம் செலுத்தவதாய் முடிவு செய்துள்ளேன்.

இனி விருதுகள் – பதிவுலகம் 2010

சிறந்த திரட்டி – தமிழிஷ்

சிறந்த இணைய செய்திதாள் – தட்ஸ்தமிழ்.காம்

சிறந்த திரைத்துறை இணைய செய்தித்தாள் – தமிழ்சினிமா.காம்

சிறந்த பதிவர் – சுரேஷ்கண்ணன் – பிச்சைபாத்திரம்

சிறந்த பதிவு – அபத்தமான சமகாலம் - சுரேஷ்கண்ணன்

சிறந்த நகைச்சுவை பதிவர் – பன்னிக்குட்டி ராமசாமி

சிறந்த சர்ச்சைக்குரிய பதிவு – டோண்டு ராகவனின் – பார்வதி அம்மாளுக்கு அனுமதி மறுத்த விஷயம்

சிறந்த ஏமாற்றிய விமர்சனம் – கேபிள்சங்கரின் – களவானி விமர்சனம்

சிறந்த கவிதை – ஹைக்கூ – நாஞ்சில் பிரதாப்

சிறந்த நக்கல் – விருதகிரி – லக்கிலுக்

சிறந்த சினிமா விமர்சகர் – சி.பி செந்தில்குமார்

சிறந்த தொழில்நுட்ப பதிவர் – சூர்யாகண்ணன்

சிறந்த சமூகஅக்கறையுள்ள ப்ளாக் – வினவு

ரசித்த பதிவு – சூப்பர்ஸ்டாரிடம் சிலகேள்விகள் – பிலாசபி பிரபாகரன்

சிறந்த விமர்சனம் – ரத்தசரித்திரம் – ஓ ஆனால் நெகட்டிவ் – கார்க்கி

சிறந்த அறிமுக பதிவர் – சி.பி செந்தில்குமார் – அட்ராசக்க

சிறந்த செய்தி அலசல் - ரத்த சரித்திரம் - ரத்தம் தெறிக்கும் உண்மைக்கதை