எந்திரனும் கருப்பாயி கிழவியும்

கருப்பாயி கிழவிக்கு ஒன்றும் புரியவில்லை. இவன் ஏன் இப்படி இருக்கிறான். இவனுக்கு என்ன சொல்லி புரியவைப்பது. கன்னத்தில் கைவைத்து உக்கார்ந்து விட்டாள்.

“ஏ..என்ன கிழவி..இப்ப என்ன கப்பலா கவுந்து போச்சு..இப்படி கைவைத்து உக்கார்ந்து கிடக்க..” பக்கத்து வீட்டு ஜெயராசு

“வாங்கண்ணே..நீங்களாவது இந்த அநியாயத்தைக் கேட்ககூடாதா..”

“என்ன நடந்து போச்சுங்குறேன்..”

“இந்த பயபுள்ள வினோத்து..இப்படி இருக்கானே..நான் என்னத்த சொல்ல..ஏதோ ரசினி படம் ரீலீஸாமாம்..காலங்காத்தால 1 மணிக்கெல்லாம் கிளம்பி போயிட்டாங்குறேன்…”

“ஏ..எப்பே கிழவி..இப்ப எங்கிட்டு போனான்..படத்துக்குதானே போனான்..இம்புட்டு சலிச்சுக்குறேயே…”

“ஜெயராசண்ணே..எல்லாம் தெரிஞ்ச நீங்களே இப்படி சொல்லிப்பிட்டீக..உங்களுக்கே தெரியும்., அவனை நம்பிதான் வீட்டுல கஞ்சி குடிக்கிறோம். அவன் டெய்லி சம்பாதிச்சு வர்லைன்னா, வீட்டுல சோறு பொங்குமா..”

“ஏ..கிழவி..இதுக்குபோயி ஏன் மூக்கை சீந்துற..இப்ப என்ன நடந்துச்சு..இளவட்ட பசங்க..அப்படிதான் இருப்பாய்ங்க..அது என்ன நம்ம காலமா..இந்த காலபுள்ளைங்களாம், அப்படிதாங்குறேன்..இந்தா..என் வீட்டுல இருக்கான் பாரு. முந்தாநேத்தே கிளம்பிட்டான்..அட கடவுட் வைக்கிறதென்ன..சீரியல் செட்டு போடுறதென்ன..பம்பரமா சுத்துறாங்குறேன்..நம்ம சொல்லி எங்க கேக்க போறாயிங்க..அந்த காலமெல்லாம் வேறங்குறேன்..”

“அட நீங்க வேறண்ணே..நான் என்ன படம் பார்க்கவேணாமுன்னு சொல்லுறேன்..நல்லா வேளைவெட்டியை முடிச்சுபுட்டு, ஒரு கஞ்சியை கிஞ்சியை குடிச்சுப்புட்டு மெதுவா தியேட்டருக்கு போயி பார்க்கட்டும்..நான் என்ன கட்டியா வைக்கிறேன்..அதென்ன முத நாளிலே பார்க்கணும்..போன தடவை இப்படித்தான், கூட்ட நெரிசிலலே நின்னு, டிக்கெட் வாங்குறோமுன்னு போலிசு அடிச்சதுல்ல, முட்டி பேந்து வந்தப்ப, என் உசிரே போயிடுச்சு தெர்யுமாண்ணே..பயபுள்ள தூக்கத்துல வலிதாங்கம “யம்மா, யம்மா” கத்துனதுல..ஆத்தி என் நெஞ்சு கொலயே வெடிச்சுறும் போல இருந்துச்சு..பெத்த வயிறுண்ணே…”

“ஏ..யப்பே கிழவி..ஆ, ஊ ண்ணா அழுதுருவியே..இப்ப உனக்கென்ன குறைச்சலுங்குறேன்..நல்லாதானே உன் புள்ள பார்த்துக்குறான்..”

“கஷ்டமா இருக்குண்ணே..ஒரு டிக்கெட்டு ஆயிரம் ரூபாய்ம்ணே..புள்ள பாவம், மில்லுல ராத்திரி, பகலும் செத்த பாடா பட்டு, ஒரு வாரமா சம்பாதிச்ச காசுண்ணே..அந்த ஆயிரம் ரூபாயை சம்பாதிக்குறதுக்குள்ள, அவன் படுற பாடு இருக்கே..தெய்வம் சொல்லி மாளாதுண்ணே..ஆத்தி..ஒரு நிமிசத்துல செலவழிச்சிப்புட்டாண்ணே..ஏண்ணே, ஒரு டிக்கெட்டு ஒரு அம்பது ரூபா வந்ததும் போகக்கூடாது..”

“ஓய் கிழவி..நீ இன்னும் அந்த காலத்துல இருக்கியே..புள்ளைங்கள அதுக பாதையில விட்டுப்புடணும்..சும்மா கயிற போட்டு இழுக்க கூடாது..சரி..சரி..அவளுக்கு உடம்பு முடியலையாம்..காபி தண்ணி கேட்டா..முக்கு கடைக்கு வரைக்கும் போயிட்டு வர்றேன்..”

“தப்பா எடுத்துக்காதீங்கப்பூ..அவன் வேற வீட்டுல இல்லியா..சோறு பொங்கணும்..அரிசி தீர்ந்து போச்சு..ஒரு எட்டு வாங்கிவரலாமுன்னா, இந்த வெயிலுல நடக்க முடியலை..கிறுகிறுன்னு வருது..ஒரு குவளை அரிசி கொடுக்கீகளா..பய வந்தவுடனே, கொண்டாற சொல்லுறேன்..”

“ஏ ஆத்தா..இதுக்கு போயி இம்புட்டு தயங்குற.நீ போயி குவளைய எடுத்துட்டு வா..”

கருப்பாயி கிழவி, எழுந்து வீட்டுக்குள் போனாள். டி.வியில் சத்தமாக ஓடிக் கொண்டிருந்தது..

“கமான்…கெட் ரெடி போக்ஸ்…”